Тоголанд

Тоголанд (герм. Togoland) нь орчин үеийн Того, Гана улсудын нутаг дэвсгэр дээр 1884-1914 онд Ломе нийслэлтэй, 90,479 км² газар нутагтай Баруун Африк дахь Германы эзэнт гүрний эзэмшилд оршиж байсан улс юм.

Тоголандын газрын зураг

Түүх

Тоголанд нь баруун талаараа Британийн колони болох "Алтан эрэг" (англи. Colony of the Gold Coast), зүүн талаараа Францын "Дагомей" (франц. Dahomey) колони хоёрын дунд оршдог байв. Эве үндэстэн голчлон суурьшсан бусад олон уугуул үндэстэнэй тус улс 1884 онд Африкийг эзлэх их гүрнүүдийн тэмцлийн үеэр Германы канцлер Отто фон Бисмарк энэ газар нутгийг Германы эзэнт гүрэнд харьяалагдах болсоныг тунхагласны дараагаар бусад европын орнууд хүлээн зөвшөөрсөн ажээ.

Дэлхийн 1-р дайны үед Тоголандыг Их Британи, Франц эзэлсэн бөгөөд 1924 онд Үндэстнүүдийн лигийн мандатаар Тоголандыг албан ёсоор хоёр хуваасан байна. Дагомейтэй хиллэдэг тус улсын гуравны хоёр нь (Ломе хот ороод) Францын Тоголанд, Алтан эрэгтэй хиллэдэг үлдсэн хэсэг нь Британийн Тоголанд болсон түүхтэй.

Дэлхийн 2-р дайны дараа 1946 онд хоёр Тоголанд НҮБ-ын итгэмжлэгдсэн нутаг дэвсгэр болсон. Британийн Тоголанд нь засаг захиргааны хувьд Алтан эргийн нэг хэсэг болж, 1957 онд тусгаар тогтнолоо олж Бүгд Найрамдах Гана улс болжээ. Францын Тоголанд нь Дагомей (орчин үеийн Бенин) улсаас тусад нь захирагдаж, 1960 онд тусгаар тогтнолоо олж, Бүгд Найрамдах Того Улс болсон байна.