Падуа

Падуа (итали. Padova [ˈpaːdova], унгар. Pàdova, заримдаа Pàdoa, латин. Patavium, истор. герман. Esten) ) нь Италийн хойд хэсэгт орших Венето мужийн хот бөгөөд ижил нэртэй Падуа тойргийн төв юм. Энэ хот нь Баччилионе голын эрэг дээр, Венец хотоос баруун зүгт 40 км зайд, Виченцагаас зүүн өмнө зүгт 29 км зайд оршдог бөгөөд 210,000 хүн амтай (2024 оны байдлаар). Энэхүү хот нь мөн тухайн бүс нутгийнхаа эдийн засаг, харилцаа холбооны төв юм. Баччилионе голоос гадна нэгэн цагт Падуа хотын дундуур урсдаг байсан Брента гол хойд дүүргүүдийг шүргэн өнгөрдөг. Хөдөө аж ахуйн үндсэн газар нутаг нь Венецийн тэгш тал юм.

Троя хотын хунтайж Антенорын байгуулсан гэгдэх домгийн дагуу энэхүү хотыг венецчүүд МЭӨ 13-р зуунаас эхлэн оршин сууж байв. МЭӨ 4-р зуунд тэд галлчуудын давтан довтолгооноос өөрсдийгөө хамгаалахаас өөр аргагүй болсон бөгөөд энэ удаад тэд Ромын соёл иргэншилтэй холбоо тогтоож, тэдэнтэй нягт холбоо үүсгэсэн. Муж хэсэг гэж цоллогдох болсон Падуа хот нь 1-р зуунд Ромын үед Патавиум (латин. Patavium) нэртэй байсан бөгөөд Италийн хамгийн баян хот гэж нэрлэгдэж байв. Каррареси болон Да Каррара гэх эрхмүүдийн ноёрхлын ачаар Падуа хот нь XIV зууны соёл иргэншлийн нийслэлүүдийн нэгд тооцогдож байсан бөгөөд 14-15-р зууны хооронд Падуагийн сэргэн мандалт гэж нэрлэгддэг соёлын урсгал Флоренцтэй хамт хөгжиж, энэ нь 15-р зууны Италийн хойд бүсийн урлагт хүчтэй нөлөөлсөн байна.

Падуа нь ЮНЕСКО-гийн Дэлхийн өвийн жагсаалтад хоёр бүртгэлтэй: дэлхийн хамгийн эртний болох Ботаникийн цэцэрлэг болон хотын төвд байрлах барилгууд дээрх 14-р зууны үеийн ханын уран зургууд юм. Үүний нэг жишээ бол 1300 оны эхээр Жиоттогийн зурсан "Скровегни сүм" юм.

Падуа хотод 1222 онд байгуулагдсан, дэлхийн хамгийн эртний их сургуулиудын нэг болох Падуагийн их сургууль байрладаг бөгөөд Галилео Галилей, Николай Коперник зэрэг эрхэм алдарт эрдэмтэд хичээл зааж мөн суралцаж байв. 1610 онд Галилео Падуа хотод гар хийцийн дурангаар Бархасбадийн сарыг ажигласан нь Коперникийн хувьсгалын хоёр дахь үе шатыг эхлүүлж байв. Өнөөдөр тус их сургууль нь 72,000 орчим оюутантай бөгөөд хотын амралт зугаалга, урлаг, эдийн засгийн үйл ажиллагаанд гүн нөлөө үзүүлдэг байна.