Данзанваанчигийн Ухнаа

Данзанваанчигийн Ухнаа (Дорноговь аймгийн Дэлгэрхэт буюу одоогийн Иххэт суманд 1941 онд төрж, 2022 оны 11-р сарын 28-нд Улаанбаатар хотод нас барсан) - Монгол Улсын Ардын жүжигчин-2017 онд, Монгол Улсын Хөдөлмөрийн баатар-2022 онд, 1993 онд Соёлын гавьяат зүтгэлтэн. Тэрбээр Чөлөөлөх дайнд оролцогч БНМАУ-ын баатар Д.Данзанванчигийн хүү юм.

1960 онд Дорноговь аймагт арван жилээ төгссөн сурагч дуучин болох хүсэлтэй нийслэлд ирсэн. 1960 онд анх “Учиртай гурван толгой” дуурийн “Юндэнгийн дагуулаар” анх гарч байсан.

1967-1972 онд Болгар улсын Софи хотын хөгжмийн дээд сургуульд сурч төгссөн. Сургуулиа төгсөөд 1972 онд Филармонид анхны гоцлол дуучнаар ажилласан байна.

1983 онд Москвагийн Театр урлагийн дээд сургуулийн эстрадын найруулагчийн дээд дамжаанд мэргэжил дээшлүүлсэн байна. УДБТ-т дуучин, 1972 оноос улсын филармонийн туслах найруулагч, уран сайхны удирдагч, 1983-2001 онд даргаар ажиллажээ.

Д.Ухнаа гуай нь Улсын хөгжимт драмын театрын дуучнаас ажлын гараагаа эхэлж, соёл, урлагийн хөгжлийн төлөө тасралтгүй 60 гаруй жил хөдөлмөрлөхдөө Монголын болон дэлхийн сонгодог олон арван дуурьт гол дүр бүтээж, Улсын Филармонийн симфони найрал хөгжмийн 200 гаруй тоглолт, "Соёл-Эрдэнэ" хамтлаг, "Баян Монгол" чуулгын 400 гаруй тоглолтыг удирдан зохион байгуулж, 4,500 гаруй концерт хөтөлж, 220 гаруй концерт найруулан үзэгч түмний хүртээл болгосон, дэлхийн 70 гаруй улсад Монголын урлагийн 400 гаруй удаагийн тоглолт зохион байгуулан үндэсний болон эстрад урлагийг сурталчлан таниулж, соёл, урлагийн салбарыг хөгжүүлэх их үйлсэд үнэтэй хувь нэмэр оруулсан эрхэм билээ.

Шавь нараас нь Б.Баяраа /агсан/, Б.Сарантуяа /УГЖ/, Х.Төмөрбаатар /УГЖ/, Ч.Насантогтох /УГЖ/, Л.Оюунчимэг /агсан/, Д.Эрдэнэтуяа зэрэг нэрт дуучид төржээ.