Даду чөлгөө

Даду чөлгөө (ханз: 大都路, пиньинь: Dàdū lù) нь Монголын Юань Улсын засаг захиргааны нэгж юм. Уг чөлгөө нь Юань Улсын нийслэл хот, түүний доор 1 фу, 10 жоугаас бүрддэг байсан.

Тойм

Хубилай хаан Их Монгол Улсын нийслэл хотыг 1267 онд хуучин Алтан улсын Дундад нийслэл (Жунду) рүү шилжүүлэх зарлиг гаргаж, 1272 онд барилгын ажил дууссаны дараа уг жилд Даду чөлгөө хэмээх нэгжийг байгуулахад төв хот нь Дасин фу болсон. Даду чөлгөө нь Дасин фу, Жуожоу, Бажоу, Тунжоу, Жижоу, Шүньжоу, Таньжоу, Дунаньжоу, Гүаньжоу гэсэн орон нутгийн нэгжээс бүрдэх болсон.

1316 онд тус чөлгөөнд харьяалагдаж байсан Жиншань шянийг лунчин жоу, Хуайлай шянийг шүжоу болгосноор 2 жоутай болж өргөжсөн. 1368 онд Мин улсын армид эзлэгдсэний дараа Даду чөлгөө нэрийг халж, Бэйпин фу болгон өөрчилсөн.

Уг засаг захиргааны нэгж нь одоогийн Бээжин хот, Хэбэй мужийн Хуайлай шянь, Жижоу, Бажоу, Янчин шянь, Цагаан хэрмийн өмнөд хэсэг, Тяньжинь хотын Учин, Дачэн шяний хойд, Зүньхуа шянь болон Их Сувгийн баруун эрэг орчмын нутгийг багтааж байв.