Лхамсүрэнгийн Энэбиш

Лхамсүрэнгийн Энэбиш
	Лхамсүрэнгийн Энэбиш
УИХ-ын Дарга
	2000-2001
Өмнөх	Раднаасүмбэрэлийн Гончигдорж
Дараах	Санжбэгзийн Төмөр-Очир
Монгол
	1992-2001
Овог нэр	Лхамсүрэнгийн Энэбиш
Төрсөн	1947/06/01 ; Монгол, Булган аймаг
Улс	Монгол (БНМАУ → МУ)
Нам эвсэл	Монгол ардын хувьсгалт нам
Мэргэжил	улс төрч

Лхамсүрэнгийн Энэбиш (1947 оны 6-р сарын 1-нд Булган аймгийн Могод сумын Өвөр булаг хэмээх газар төрсөн- 2001 оны 9-р сарын 29-нд Улаанбаатарт нас барсан) -Монгол Улсын Их Хурлын даргын албыг 2000-2001 онуудад, Улаанбаатар хотын захирагчийн албыг хашиж байсан улс төрч юм.

Намтар

Л.Энэбиш 1955 онд Булган аймгийн Хишиг-Өндөр сумын 7 жилийн дунд сургуульд орж дараа нь Улаанбаатар хотын 10 жилийн 18 дугаар дунд сургуульд 1960 онд шилжин орж 1965 онд төгссөн байна.

1965-1970 онд Монгол улсын их сургуулийн барилгын сантехникийн инженерийн ангид сурч төгссөн байна.

Тэрээр Их сургуулиа төгсөөд 1970-1975 онд Улаанбаатар хотын АДХ-ын гүйцэтгэх захиргааны барилгын зураг төслийн товчоонд сантехникийн инженер, ерөнхий инженер, дарга, 1975 - 1977 онд Улаанбаатар хотын барилга, архитектурын газрын орлогч дарга бөгөөд ерөнхий инженер, 1977-1980 онд Улаанбаатар хотын АДХ-ын гүйцэтгэх захиргааны орон сууц, нийтийн үйлчилгээний хэлтсийн даргаар ажилласан.

1980-1983 онд БНМАУ-аас ЗСБНХУ-д суугаа ЭСЯ-ны эдийн засгийн зөвлөхийн товчоонд мэргэжилтэн.

1983-1990 онд Улаанбаатар хотын АДХ-ын гүйцэтгэх захиргааны орлогч даргаар тус тус ажиллаж байв. Л.Энэбиш 1990-1992 онд Улаанбаатар хотын АДХ-ын Тэргүүлэгчдийн дарга, Улаанбаатар хотын даргаар тус тус ажиллажээ.

1992 оны УИХ-ын сонгуулиар Л.Энэбиш гишүүнээр сонгогдож, МАХН-ын Удирдах Зөвлөлийн гишүүн, 1992 оны 10-р сараас Монгол Улсын Ерөнхий сайдын орлогч, улмаар 1993-1996 онд Монгол Улсын шадар сайдаар ажиллахдаа гүйцэтгэх засаглалын тогтолцоо, орон нутгийн засаг захиргааг шинэ Үндсэн хуулийн дагуу бүрдүүлэх, төрийн албаны тогтолцоог төлөвшүүлэхэд гол үүрэг гүйцэтгэжээ. Түүнчлэн Монгол Улсын "Өмч хувьчлал"-ын асуудлыг удирдан хариуцаж байжээ.

Л.Энэбиш 1997 оноос МАХН-ын Ерөнхий нарийн бичгийн даргаар сонгогдон ажилласан.

2000 оны УИХ-ын сонгуулиар Булган аймгаас МАХН нэр дэвшүүлж дахин сонгогдож улмаар Улсын Их Хурлын даргын (2000-2001) албыг хашжээ.

Л.Энэбиш төр засаг, намын удирдах алба хашихын зэрэгцээ Монгол-Хятадын найрамдлын нийгэмлэгийн дарга, Монголын самбо бөх сонирхогчдын холбооны ерөнхийлөгч, Дэлхийн Самбо бөх сонирхогчдын холбооны дэд ерөнхийлөгч, Нийслэлийн бизнесийн холбооны ерөнхийлөгч зэрэг улсын хийгээд олон улсын хэмжээний сонгуульт ажил хийж байжээ.

Тэрбээр 2001 оны 9-р сарын 29-нд зуурдаар нас барсан байна.