Готовын Аким

Хатагин овогт Готовын Аким (1942 онд Дорнод аймгийн Матад сумын Тэмээт гэдэг газар төрсөн) Монголын зохиолч, сэтгүүлч, орчуулагч. Монгол Улсын Соёлын гавьяат зүтгэлтэн.

Намтар

1942 онд Дорнод аймгийн Матад сумын Тэмээт гэдэг газар өөлд ястан, дунд сургуулийн багш Готовын хүү болж төржээ.

Эцэг Готов нь Дорнодын Бяруут бага сургуулийг 1930-аад онд төгсөөд 15 настайгаасаа багшилсан байна.

1961-1966 онд Улсын Багшийн дээд сургуульд сурч орос хэл, утга зохиолын анги төгссөн.

1966-1969 онд УБДС-д орос хэл, утга зохиолын багш.

1969-1990 онд "Энх тайван, социализмын асуудал" сэтгүүлд орчуулагч, редактор.

1990-1991 онд МОНЦАМЭ агентлагийн сонин сэтгүүлийн ерөнхий эрхлэгч.

1990 рны 9-р сараас 2000 онд “Ил товчоо” сониныг санаачилж Ерөнхий эрхлэгчээр ажиллаж байсан.

2000-2005 онд "Соёл эрдэм" дээд сургуулийн гүйцэтгэх захирал.

2005-2010 онд Үндэсний номын сангийн захирал.

Монголд чөлөөт хэвлэлийг хөгжүүлэхэд хувь нэмэр оруулсан хүн юм.

Бүтээл

Лев Гумилевын “Хар домог”, Чингиз Айтматовын “Цаазын тавцан”, "Зуунаас ч урт өдөр", Габриель Гарсиа Маркесын “Зуун жилийн ганцаардал”, “Ундаассан бурхад”, Александр Гриний “Аранзал даруулт хөлөг” зэрэг 16 ном, бүтээлийг орос, англи хэлнээс орчуулжээ.

Эрдэмтэн зохиолч, нэрт орчуулагч Бямбын Ринчен судлалаар “Билгүүн номч Бямбын Ринчен” зэрэг 4 номыг эмхэтгэж хэвлүүлсэн байна.

Мөн “Цэцэн билгийн сувд эрхи” (англи-монгол, монгол-англи цэцэн үгийн толь), “Хамбын овооны яс юу өгүүлнэ вэ? “, “Тэнгэрийн нохой”, “Чингисийн оюун билгийн соёрхол”, "Хөрстөд ганц Чингис Хаан" буюу Хөх Монголчуудын өлзий учрал), “Туульс хайлдаг уулс 1, 2”, “Шашдирын чуулган 1, 2, 3”, “Чингис хааны сүлд буюу эргэсэн хасын утга ‘, “Хаднаа шингэсэн аялгуу оршивой” зэрэг 30-аад ном туурвисан.

Гэр бүл

1962 онд орос хэлний багш Түндэвийн Дулмаатай гэрлэсэн. 3 хүү төрүүлснээс 1 нь нас баржээ.