Говь (компани)
“ГОВЬ” ХК нь 1981 онд Япон улсын хөрөнгө оруулалттайгаар байгуулагдсан үндэсний ууган үйлдвэрлэгч юм. “ГОВЬ” ХК-ийн төрийн мэдлийн хувьцааг 2007 оны 7 сард “Эф Си Ай” ХХК Олон улсын нээлттэй дуудлага худалдаагаар худалдан авснаар “ГОВЬ” ХК хувийн хэвшлийн бүтэц зохион байгуулалт, менежменттэйгээр үйл ажиллагаагаа явуулж байна. Монгол ямааны 100% ноолуур, тэмээний ноос болон сарлагийн хөөврийг ашиглан дэлхийн зэрэглэлд нийцсэн хамгийн сүүлийн үеийн техник, технологиор үйлдвэрлэл явуулдаг дэлхийд цөөнд тооцогддог ноолуурын цогц үйлдвэр юм. Үйлдвэрлэл, хүчин чадал, чанар, үйлчилгээ зэрэг бүх талын үзүүлэлтээрээ дэлхийн топ 10-н ноолууран бүтээгдэхүүн үйлдвэрлэгчийн тоонд зүй ёсоор тооцогддог билээ.
| Говь ХК | |
|---|---|
| |
| Эрх зүйн хэлбэр | Хувьцаат компани (Монголын хөрөнгийн бирж:[1]) |
| Үүсгэн байгуулагдсан | 1981 оны 9 сарын 5 |
| Төв байр | Улаанбаатар,  Монгол
|
| Удирдлага | Д.Гэрэлмаа (ТУЗ-ийн дарга) Ц.Баатарсайхан гүйцэтгэх захирал |
| Ажилчид | ▲ 2200 (2018 он) |
| Эргэлтийн хөрөнгө | ▲ ₮ 88.7 тэрбум (2016 он)[1] |
| Салбар | Ноос, ноолууран бүтээгдэхүүн |
| Бүтээгдэхүүн | Gobi Cashmere бренд Gobi Organic Cashmere Goyo бренд Goyo Kids бренд Yama бренд |
| Цахим хуудас | www.gobi.mn |
ГОВЬ кашмер нь Улаанбаатар хотод хоёр салбар дэлгүүртэй бөгөөд төв салбар нь Хан-Уул дүүрэгт байрладаг. Тус компани нь түүхий эдийг дундын дамжлагагүйгээр малчдын гар дээрээс шууд бэлтгэн нийлүүлж авдаг бөгөөд маш сайн технологиор боловсруулан өндөр зэрэглэлийн ноолууран бүтээгдэхүүнийг хэрэглэгчдэд хүргэдэг байна. Мөн ГОВЬ кашмер нь олон улсын хэрэглэгчдэд өндөрөөр үнэлэгддэг ба (Gobi, Gobi Organic, Goyo, Goyo kids, Yama) гэх брэндүүдтэй. Дэлгүүрийн дотоод засалд монгол ахуйн онцлогийг шингээж, байгалийн дулаан өнгөөр шийдэн өвөрмөцөөр тохижуулсан бөгөөд өдөрт дунджаар 200 хэрэглэгч үйлчлүүлж байна.
Түүх
засварлах“Говь” ХК нь 1981 онд Япон улсын хөрөнгө оруулалттайгаар байгуулагдсан үндэсний ууган үйлдвэрлэгч юм. Компанийн нэр нь ховор амьтан, ургамлын амьдрах орчин болсон байгалийн өвөрмөц тогтоц бүхий Говь цөлийг илтгэнэ. Мөн түүхий ноолуурын дийлэнх хэсгийг авдаг гол байршил юм.
ЮНИДО төслийг хэрэгжүүлэх хүрээнд ноолуур, тэмээний ноос боловсруулах туршилтын үйлдвэр нээгдсэн. Гурван сарын турш Япон улсад ноолуур, тэмээний ноос боловсруулах, үйлдвэрийн машин механизм ажиллуулах чиглэлээр 78 инженер бэлтгэжээ.[2]
Төрийн өмчит "Говь" компанийг 2007 оны долдугаар сард "Эф Си Ай" ХХК хуулийн дагуу хувьчилсан. Олон жилийн турш ноолуур нь нүүдэллэн амьдардаг тариаланчдын хувьд амин чухал түүхий эд байсаар ирсэн. Монгол Улсын экспортын гол бүтээгдэхүүний нэг нь тал нутаг, уул нуруу, ой модонд цэцэглэн ургадаг ямааны самнасан зөөлөн ноос юм. Бусад эрэлттэй экспортод зэс, алт, нүүрс зэрэг ашигт малтмал орно.[3]
2012 онд Монгол орны ашигт малтмалын огцом өсөлт ГОВЬ-ийн үйлдвэрлэлийн өртгийг өсгөв. Энэ нь Монголын шинээр олдсон ашигт малтмалын баялаг тухайн жилийн инфляцыг 12% - иар өсгөсөнтэй холбоотой байв. Энэ нь бусад бизнес эрхлэгчид, ялангуяа ноолуурын түүхий эдийн үнийг өсгөхөд үлэмж нөлөө үзүүлсэн.
2019 оны байдлаар "Говь" компани нь 3000 орчим ажилтантай болсон юм. 2019 оны 9-р сард тус компани Лос Анжелес дахь АНУ-ын оффис, зөвхөн АНУ-ын үйлчлүүлэгчдэд зориулсан цахим худалдааны вэбсайт нээх гэж буй тухайгаа олон нийтэд зарласан.[4]
Түүхэн товчоон
засварлах"ГОВЬ” ХК нь ил тод байдлыг нэмэгдүүлж, компанийн олон нийтийн итгэлийг дээшлүүлэх зорилгоор он цагийн хэлхээс, ололт амжилт, нийтэд хүргэх гол агуулга зэрэг дэлгэрэнгүй тайланг жил бүр Монголын Хөрөнгийн Биржид тайлагнадаг.[5]
- 1976 он - ЮНИДО-ийн төслийн хүрээнд ямааны ноолуур, тэмээний ноос боловсруулах туршилтын үйлдвэр ашиглалтад оров.
- 1977 он - Япон улсын Засгийн газраас БНМАУ-ын Засгийн газарт 5.0 тэрбум иенийн буцалтгүй тусламж олгож, Улаанбаатар хотноо ноос ноолуур боловсруулах үйлдвэр байгуулах тухай Монгол-Японы Засгийн газрын хэлэлцээр байгуулав.[6]
- 1981 он - Ямааны ноолуур, тэмээний ноос боловсруулах үйлдвэрийн машин тоног төхөөрөмжийн угсралт, тохируулгын ажлыг гүйцэтгэн, технологийн шугамыг ашиглалтад хүлээн авч, Монгол-Японы хамтын ажиллагааны хүрээн дэх анхны байгууламж “ГОВЬ” үйлдвэр үүд хаалгаа нээлээ.[6]
- 1987 он - Компьютерын автомат удирдлага бүхий Япон улсын SET-092 сүлжих машиныг үйлдвэрт суурилуулав.
- 1991 он - Олон улсын ISO-9000 стандартыг үе шаттайгаар нэвтрүүлж[6], үйлдвэрлэсэн бүтээгдэхүүний 98 хувийг экспортлон Олон улсын чанарын цом, гэрчилгээг авсан Монгол улсын анхны үйлдвэр боллоо.[7]
- 1993 он - Монгол Улсын Засгийн газрын Өмч Хувьчлалын Комиссын тогтоолоор “ГОВЬ” УҮГ-ыг “ГОВЬ ”ХК болгон зохион байгуулж, МХБ-д бүртгүүлэн, нийт дүрмийн сангийн 25.1% буюу 1,919,061 ширхэг хувьцаа нь хөрөнгийн биржээр арилжаалагдсан.
- 1997 он - Монголд анх удаа ноос ноолууран хөнжил, ноолууран давуу, драф, нарийн номерын ээрмэл утас үйлдвэрлэх “Говь-2″ үйлдвэрийг ашиглалтад оруулав.
- 1998 он - Гадаад зах зээлээ өргөжүүлэн Япон улсад “Алтай”, Бельги улсад “Gobi Europe”, АНУ-д “Gobi- USA” зэрэг охин компаниуд байгуулж, дэлхийн 30 гаруй оронтой түншийн харилцаагаа өргөжүүлэн тогтоов.
- 2000 он - Утас будах технологи нэвтрүүлэв. Орчин үеийн компьютерын системд холбогдсон STOLL-330 сүлжих машиныг суурилуулав.
- 2007 он - "ГОВЬ” компанийн төрийн өмчлөлд байсан 73.45%-н хувьцааг “ЭФ СИ АЙ” ХХК Олон улсын нээлттэй дуудлага худалдаагаар худалдан авснаар “ГОВЬ” ХК хувийн эзэмшилд бүрэн шилжлээ.
- 2008 он - Үйлдвэрийн дэргэдэх Төв дэлгүүрийн барилгын дизайныг Японы алдарт архитектор Сайко Кейчиро хийж гүйцэтгэн, шинэ дэлгүүр тухайн оны 6 сард нээлтээ хийлээ. [8][9]
- 2009 он - Японы Токио хотод салбар дэлгүүрээ нээлээ. Италийн “VVA Consulting Company”-тай хамтран ажиллах гэрээг байгууллаа. “ГОВЬ” Үйлдвэрт техник, технологийн шинэчлэлтүүдийг үе шаттайгаар хийсэн.
- 2010 он - Монголын ноолуурын салбарт анх удаагаа Принт технологийг нэвтрүүлэв.
- 2011 он - Үйлдвэрлэлийн хүчин чадлаа 2 дахин нэмэгдүүлэв. Италийн алдарт хувцас загвар зохион бүтээгч Саверио Палателлатай хамтарсан анхны коллекц болох “Gobi by Saverio Palatella” худалдаанд гарлаа. “ГОВЬ” ХК-ийн 30 жилийн тэмдэглэлт ой энэ онд тохиов.
- 2013 он - Үйлдвэрийн хүчин чадлыг нэмэгдүүлж “Whole Garment” буюу оёдолгүй сүлжмэл бүтээгдэхүүний шинэ технологийг нэвтрүүлэв.
- 2014 он - Монгол ямааны ноолуурын үндсэн 4 өнгө болох цагаан, цайвар шаргал, бор, хөх саарал өнгийн ноолуурыг цайруулж будахгүйгээр байгалийн өнгөөр нь бэлэн бүтээгдэхүүн болгон гаргасан "Gobi Organic" брэндийг худалдаанд гаргалаа.
- 2015 он - Японы алдарт бизнесмен Казүо Инамори-гоос үндэслэсэн АМЁБ менежментийг бие даан нэвтрүүлж эхэллээ.
- 2016 он - ХБНГУ улсад албан ёсны нэрийн дэлгүүрээ нээлээ.
- 2017 он - Оёдлын шинэ үйлдвэр ашиглалтад оруулсан ба цахим худалдааны хуудас ашиглалтад орж эхэлсэн, www.gobicashmere.com.
- 2019 он - “ГОВЬ” ХК нь “Эм Си Эс”-ээс Гоёо Кашмерыг бүрэн худалдаж авсан[5]. Монголын Худалдаа Аж Үйлдвэрийн Танхимаас зохион байгуулсан Эдийн засгийн шилдэг 100 аж ахуйн нэгжийн 18-р байранд шалгарсан.
- 2021 он - WPP Группын нэг хэсэг болох “Ogilvy” агентлагтай маркетингийн зөвлөгөө өгөх чиглэлээр хамтран ажиллахаар болсон.
- 2022 он - Технологийн илүүдэл түүхий эдийг ашиглан байгаль орчинд ээлтэй “Cashmere Reborn” цуглуулгаа гаргасан.
- 2023 он - Италийн алдарт дизайнер Giorgio Spina "ГОВЬ" ХК-ийн ерөнхий дизайнераар сонгогджээ.[10]
Үйл ажиллагааны товчоон
засварлах"ГОВЬ" ХК нь Монгол Улсын Их Төрийн Ордны хажууд байрлах Galleria Ulaanbaatar Mall-д 2500 мкв ноолууран эдлэлийн дэлгүүртэй "Дэлхийн хамгийн том ноолуурын дэлгүүр" - ийн нэрийг эзэмшдэг. 2016 онд "ГОВЬ" ХК нь ноос ноолууран бүтээгдэхүүний чиглэлээр дэлхийд нэгт орж, ноолуурын салбарт хувьсгал хийхээ амлажээ.
“ГОВЬ” компани үйлдвэрээсээ жилд 1,200 тонн кг түүхий ноолуур боловсруулж, ойролцоогоор 500,000 ширхэг сүлжмэл эдлэл, 250,000 метр нэхий нэхмэл эдлэл, 25,000 ширхэг захиалгат хувцас үйлдвэрлэж байна. Нэг ямаа жилд 200-380 грамм ноолуур л гаргаж чаддаг гэж үзвэл “ГОВЬ”-ийн ийм их хэмжээний түүхий эд худалдан авах чадвар нь түүний нийлүүлэлтийн бат бөх тогтолцоо, уламжлалт нүүдэлчин малчидтай нягт уялдаа холбоотой хамтран ажиллаж байгааг илтгэнэ. Экспортын хамгийн голлох бүтээгдэхүүн бол ноолууран цамц, ноолууран пальто бөгөөд үйлдвэрлэлийн 80 гаруй хувийг бүрдүүлдэг. Үлдсэн хэсэг нь бээлий, малгай, оймс гэх мэт ноолууран дагалдах хэрэгслээс бүрддэг. Монгол улс дэлхийн ноолуурын үйлдвэрлэлийн 50 гаруй хувийг үйлдвэрлэдэг ба үлдсэн хэсэг нь уулархаг газар нутагтай улсуудаас ирдэг ба Хятад, Иран, Афганистан зэрэг орнууд багтдаг байна.
Ц.Баатарсайхан нь 1995 оноос хойш “Говь” ХК-ийн ерөнхийлөгчөөр ажиллаж байгаа ба түүнээс өмнө нь "ГОВЬ" ХК-ийн гүйцэтгэх захирлаар ажиллаж байсан. Хуучин төрийн өмчит ноолуурын компанийг Монголын хамгийн том ноолуур үйлдвэрлэгч болгож дэлхийн брэнд болгоход чухал үүрэг гүйцэтгэсэн юм. Түүнийг Монгол Улсын Засгийн газраас улсын эдийн засагт оруулж буй хичээл зүтгэл, нөр их хөдөлмөрийг нь үнэлэн Хөдөлмөрийн Баатар цолоор шагнажээ.[5]
"ГОВЬ” ХК нь Martin Parker, Joseph Abboud, Tadashi Shoji, Narciso Rodriguez, Donna Karan, хамгийн сүүлд Giorgio Spina зэрэг гадаадын олон алдартай дизайнеруудтай хамтран ажиллаж байна. Эдгээр алдартай дизайнерууд “ГОВЬ”-ийн ноолуурыг дэлхийд таниулах, хамгийн шилдэг монгол ноолуураар бүтсэн урлалын загвар, хийц бүрийг дэлхийд таниулах зорилгоор олон коллекцуудыг зохион бүтээн гаргаж байжээ.
"ГОВЬ" ХК-ийн зорилт
засварлахЭрхэм зорилго: Загварлаг, чанартай, үнэ цэнтэй ноолууран хувцсаа дэлхийд таниулж хүн бүрийг гоёно.
Алсын хараа: Амьдралын алхам бүрийг ноолууртай хамт.
Уриа: Ноолууран хувцсыг хүн бүрд
Охин компани
засварлах"ГОВЬ” ХК нь нийтдээ 6 охин компанитай бөгөөд тэдгээр нь ГОВЬ Кашмер Европ (Gobi Cashmere Europe GmbH), ГОВЬ Монгол Кашмер АНУ (Gobi Mongolian Cashmere USA Corp), ГОВЬ Кашмер (Өвөр Монгол) ХХК (Gobi Cashmere (Inner Mongolia) ltd.), Говь Кашмер НВУ ХХК (Gobi Cashmere UK ltd.), Говь Кашмер Казахстан (Gobi Cashmere Kazakhstan LLP), болон Говь Австрали (Gobi Australia). Эдгээр охин компаниуд нь тус тусын бүс нутаг дахь ГОВЬ-ийн ноолууран бүтээгдэхүүний борлуулалт, маркетинг, мөн ГОВЬ-ийн ноолуурын дэлхийн үйл ажиллагаанд ноолууран утас, утас түгээх, нийлүүлэх ажлыг хариуцан ажиллаж байна.
Эзлэх хувь
засварлах| Хувьцаа эзэмшигч | Хувь |
| 1) Таван Богд Грүпп | 50.35% |
| Таван Богд Трейд ХХК | 50.35% |
| 2) Хайид Интер ХХК | 34.00% |
| 3) Бусад | 15.60% |
| 4) “ГОВЬ” ХК ажилчид | 0.07% |
2023 оны 3 дугаар сарын 31-ний өдөр "ГОВЬ" ХК нь хөрөнгийн зах зээл дээр 780,112,500 ширхэг хувьцааг бүртгэж, нийт 23,172 ширхэг хувьцаа эзэмшигчээр бүртгэжээ. [11]
Дэлгэрэнгүй сурвалж
засварлах- ↑ "Жилийн тайлан - 2016 он" (PDF). gobi.mn.[permanent dead link]
- ↑ "UNIDO Publications in 1978". open.unido.org. Эх хувилбараас архивласан: 2023-11-13. Татаж авсан: 2023-11-16.
- ↑ "How One Mongolian Sweater Company Is Making Cashmere More Eco-Friendly". AFAR Media (англи хэлээр). 2023-08-31. Татаж авсан: 2023-11-16.
- ↑ Corporation, GOBI. "The Largest Cashmere Manufacturer of Mongolia Comes to the USA". www.prnewswire.com (англи хэлээр). Татаж авсан: 2023-11-16.
- ↑ 5.0 5.1 5.2 "Annual report GOBI 2021" (PDF).
{{cite journal}}: Cite journal requires|journal=(help) - ↑ 6.0 6.1 6.2 "Exploring the Wonders of GOBI Cashmere: A Behind-the-Scenes". www.gobicashmere.com (америк-англи хэлээр). Татаж авсан: 2023-11-16.
- ↑ Mongolia, Escape To. "From Goat to Coat: What to Know and Where to Buy the Best Mongolian Cashmere". www.escapetomongolia.com. Татаж авсан: 2023-11-16.
- ↑ "How One Mongolian Sweater Company Is Making Cashmere More Eco-Friendly". AFAR Media (англи хэлээр). 2023-08-31. Татаж авсан: 2023-11-16.
- ↑ Gobi Cashmere Introduction (PDF) https://web.archive.org/web/20230604211115/http://ambasadamongolii.pl/wp-content/uploads/2022/11/Gobi-Profile-ENG.pdf. Эх хувилбараас (PDF) архивласан: 2023-06-04. Татаж авсан: 2023-11-16.
{{cite news}}: Missing or empty|title=(help) - ↑ "Giorgio Spina". Jargal Defacto. Эх хувилбараас архивласан: 2023-10-31. Татаж авсан: 2023-11-16.
- ↑ "Shareholder Structure". info.gobi.mn. Татаж авсан: 2023-11-16.