Хүлүгү шаньюй

Хүлүгү (Хятадаар:狐鹿姑, пиньинь галиг:Hú lù gū) бол МЭӨ 96-85 оны үед Хүннүг захирч байсан шаньюй. Чедихөү шаньюйгийн хүү.

НамтарЗасварлах

Түүнйг шаньюй байх хугацаанд Хань улс олон удаа Хүннүтэй дайтаж байсан. МЭӨ 90 онд Ли Гуанли 70 мянган морьт цэрэг, 100 мянган цэрэгтэйгээр Шуофан хотоос[1] хөдөлж, умар зүг давшжээ. Үүний хариуд Хүннүгийн шинэ шаньюй Хүлүгү улс гүрнийхээ өнцөг булан бүрээс цэрэг татлага зохион байгуулж, угтан авч байлдав. Түүхийн баримтаас үзэхэд Хүлүгү шаньюйд Хань улсын цэргийн тоотой харьцуулахад нилээд бага тооны хүчин төвлөрч байв. Дайнд хятадын зүүн, баруун цэрэг аль аль нь амжилт олсонгүй, Хүннү нарт ялагдаж ухран зугтжээ. Харин Ли Гуанлигийн цэрэг Динлин нарыг цохиж ухраагаад тэдний хотноос бараг эзгүй үлдсэн газраар хөөцөлдөн Орхон мөрөн шахтал нэлээд амжилттай давшиж байжээ. Яг тэрхүү шийдвэрлэх мөчид Ли Гуанлигийн гэр бүл хараал хийсэн хэрэгт холбогдон баригдаад цаазаар авахуулах болж байгаа тухай мэдээ жанжны цэргийн хороонд хүрч иржээ. Үүний улмаас Ли Гуанлигийн цэргүүд нь өөрөөс нь урваж дотроо үймэж байсан нь Хүннүд ялагдах том шалтгаан болжээ. Нэгдсэн хүчгүй болж, хэдэн хэсэгт хуваагдсан хятад цэргийг Хүннү нар ээлжлэн устгасаар Ли Гуанли бүслэгдэн, аргагүйн эрхэнд бууж өгчээ. Энэ ялагдал нь Хань улсын доройтож байсан эдийн засагт хүнд цохилт болж, төрийн сан хөмрөг хоосорч, эзэн хааны дайнч бодлогод том цохилт болсон юм. Харин Хүннү нь Төв Ази, Зүүн Азид тэргүүлэх том хүчин болж, худалдаа арилжааны гол замд хяналтаа дангаар тогтоож, Хань улстай худалдаа хийхийг найрсгаар тулгахад хүрсэн. МЭӨ 85 онд Хүлүгү шаньюй өөд болсон. Түүнийг Хуяньди шаньюй залгамжилсан.

Өмнөх
Чедихөү шаньюй
Хүннүгийн шаньюй
МЭӨ 96 - МЭӨ 85
Дараах
Хуяньди шаньюй

ЭшлэлЗасварлах

  1. Одоогийн Ордост байсан эртний хот