Бөөрөнцөг түлхэлт

Бөөрөнцөг түлхэлт (Англи: Shot put) нь хөнгөн атлетикийн спортын шидэлтийн төрлүүдийн нэг бөгөөд бөөрөнцгийг хэр хол шидэхээ өрсөлддөг.

Дүрэм

Бөөрөнцгийн жин нь хүйс, насны ангиллаас хамаардаг. 2.135 метр буюу 7 фут диаметртэй тойрог дотроос шидэх ёстой. Уг тойргийн төвд оройтой, 34.92 хэмийн өнцөг дотор бөөрөнцгийг унагаасан тохиолдолд хүчинтэйд тооцогдоно. Тойргийн гадна гишгэх, зураасан дээр гишгэвэл мөн хүчингүй болно.

Шидэх арга

Дүрэм ёсоор бөөрөнцгийг хоёр мөрийг холбосон шугамаас хойно байрлуулж, шидэх ёстой байдаг тул эрүүний орчимд биедээ нааж, нэг гараараа түлхэх байдлаар шиддэг. Хөлнөөсөө түлхэлт авч шиддэг тамирчин олон байдаг ч биеэрээ эргэлдэж шиддэг тамирчин ч бас цөөнгүй.

Үүсэл

Бөөрөнцөг түлхэлт нь хүнд зүйлийг хол шидэн, "хүчээ үзэх" явдлаас үүсэлтэй гэж үздэг. Эрт дээр үед Шотландад чулууг шидэх тэмцээн зохиогддог байв. Түүнээс санаа авч 1860 онд төмрөөр хийсэн бөөрөнцөг ашиглан тэмцээн зохион байгуулсан нь өнөөдрийн бөөрөнцөг түлхэлтийн анхны тэмцээн гэж үздэг. Тэр үед шидэх талбай нь одоогийнх шиг дугуй биш, 2 метр гаруй урт бүхий талтай квадрат хэлбэртэй байлаа. Анх дугуй талбайг ашигласан нь 1867 онд АНУ-д зохиогдсон тэмцээн юм.

Бөөрөнцөг

Бөөрөнцгийн жин, хэмжээ нь дараах байдлаар тогтоогдсон байдаг. Диаметр нь эрэгтэйчүүд 11-13см, эмэгтэйчүүд 9.5-11см.

Насанд хүрэгчид
- Эрэгтэй: 7.260кг (16 фунт)
- Эмэгтэй: 4кг
Залуучууд
- Эрэгтэй: 6кг
- Эмэгтэй: 4кг

Өсвөр үе

- Эрэгтэй: 5кг
- Эмэгтэй: 2.721кг

Дээд амжилт

Эрэгтэй

Амжилт	Зай	Нэр	Харьяалал	Огноо
Дэлхий	23м12см	Ранди Барнс	Америкийн Нэгдсэн Улс	1990 оны 5 сарын 20
Монгол	17м80см	Дашдэндэвийн Махашири	Монгол	1998 оны 5 сарын 30

Эмэгтэй

Амжилт	Зай	Нэр	Харьяалал	Огноо
Дэлхий	22м63см	Наталья Лисовская	Зөвлөлт Холбоот Улс	1987 оны 6 сарын 7
Монгол	14м68см	Д.Намжилмаа	Монгол	1966 оны 6 сарын 16

Мөн үзэх

Хөнгөн атлетик

Цахим холбоос

Commons: Shot put – Викимедиа дуу дүрсний сан

Wiktionary

Wiktionary: Бөөрөнцөг түлхэлт – Энэ үгийг тайлбар толиос харна уу

Олон Улсын Хөнгөн Атлетикийн Холбоо(IAAF)