Өнөөдөр (сонин)
Өнөөдөр нь Монголын өдөр тутмын сонин юм.
2002 оны шилдэг сонин, 2003 оны шилдэг брэнд шагналыг хүртэж байсан. 1991 оноос гарч байсан "Ардын эрх" сониныг "Хэвлэл мэдээллийн эрх чөлөөний тухай" хуулийн дагуу өөрчлөн шинэчилж, 1996 оны 9 дүгээр сараас "Өнөөдөр" нэртэй гаргаж эхэлсэн. Эрхлэн гаргагч нь хэвлэл мэдээллийн "Монгол ньюс" ХХК. Үүсгэн байгуулагч нь нэрт сэтгүүлч, Монгол Улсын Соёлын гавьяат зүтгэлтэн, доктор Цэрэндоржийн Балдорж. Нэг удаагийн дугаарын хэвлэгдэх хувь нь 14000 юм. Долоо хоногт 8-32 нүүрээр хэвлэгдэн гардаг. Өөрийн хэвлэх үйлдвэртэй. Бүтэц зохион байгуулалтын хувьд албадын зохион байгуулалтаар үйл ажиллагаа явуулдаг. Улс төрийн мэдээллийн, Эдийн засаг, бизнес мэдээллийн, Нийгмийн мэдээллийн, Эрэн сурвалжлах шуурхай мэдээллийн, Залуучууд, чөлөөт цагийн мэдээллийн, Гадаад мэдээллийн, Гэрэл зургийн, Зар мэдээ, захиалга борлуулалтын, Реклам сурталчилгааны, Санхүүгийн, Аж ахуйн зэрэг 10 алба, Фотостуди, Хэвлэлийн эх бэлтгэх лаборатори, Компьютерийн төв зэрэг үндсэн нэгжтэй.
Амралт чөлөөт цагийн “Weekend” хавсралт сонинтой. Монголд анх удаа хамгийн олон нүүрээр буюу 32 нүүрээр гарсан сонин. “Улс төр”, “Танин мэдэхүй”, “Монголын хаяг-Улаанбаатар”, “Хүмүүс”, “Урлаг”, “Нийгэм”, “Ертөнц”, “Уран зохиол”, “Сониуч”, “Үйл явдлын мөрөөр”, “Спорт” зэрэг байнгын нүүр, булантай. Сонины нийт материалын 40 орчим хувийг реклам, сурталчилгаа эзэлдэг. Нийгмийн бүхий л хүрээг хамарсан сэдэв, асуудлыг тусгаж, цаг үеэ мэдэрсэн өргөн цар хүрээтэй, үнэн бодитой мэдээ мэдээллийг олон түмэнд бичлэгийн янз бүрийн төрөл зүйл, арга хэлбэрээр шуурхай хүргэхийг зорилгоо болгодог. Төр засгийн шууд дуу хоолой нь биш боловч ямар нэг хэмжээгээр түүнийг тусгахын хамт аль болох ард түмний дуу хоолой болохыг чухалчилж, нийтлэлээрээ төрийн удирдлага, бодлого чиглэлд нь нөлөөлөх, аль нэг салбар, байгууллагын эрх ашгийг илүү хөндөхгүй, давуу тал үүсгэхгүй байх замаар тэнцвэрт байдлыг хадгалсан мэдээлэл хүргэхийг нийтлэлийн бодлогын салшгүй хэсэг гэж үздэг. Олон түмний анхаарлыг татсан чухал сэдвүүдээр тогтмол хэлэлцүүлэг явуулж, “Хөндүүр сэдэв” цуврал нийтлэлээрээ оршиж буй дутагдал, доголдлыг илрүүлэх, шийдвэрлэхэд нөлөөлөхөд чиглэгдсэн асуудал хөндсөн, шүүмжлэлт материалыг нийтэлдэг онцлогтой. Материалуудыг сэдэвчилсэн нүүр, байнгын булан, боолтоор төрөлжүүлж өгдөг. Ерөнхий эрхлэгч нь Балдоржийн Нандинтүшиг.