Улаан имж

Улаан имж (Macropus rufus) нь хамгийн том имж, Австралийн хамгийн том уугуул хөхтөн, мөн өдгөө амьд буй хамгийн том уутат амьтан юм.

Улаан имж
Ховордолтын зэрэглэл
Ховордоогүй (ОУБХХ)
Биологийн ангилал
Аймаг: Амьтан Хүрээ: Хөвчтөн Анги: Хөхтөн Доод анги: Marsupialia Баг: Diprotodontia Овог: Macropodidae Төрөл: Macropus Зүйл: M. rufus
Латин нэр
Macropus rufus Desmarest, 1822

Гадаад төрх

Эмэгчин

Энэхүү том зүйлийн имж нь богино тачир улаан бор өнгийн арьс үстэй ба эрүү болон хөл хэсэг нь цайвар өнгөтэй. Эмэгчин нь биеэр жижиг, бор хольцтой хөх сааралдуу өнгөтэй байна. Урд хоёр богино хөл нь жижиг сарвуутай, хойд хөл нь булчинлаг бүдүүн, дэгдэж харайхад зохицсон байх ба урт хүчтэй сүүлээ тулгуур болгон ашиглаж зогсдог. Эрэгчин улаан имж ганц харайлтаар 9 м хүртэл зайнд үсэрдэг аж. Нас бие гүйцсэн эрэгчин 1.4 м урт, 85 кг жинтэй ба сүүлний урт 0.9-1 м хүрнэ.

Улаан имжний харах орчин нь нүдний байршлаас шалтгаалан 300° эргэн тойрноо харж чадах ажээ.

Зан авир

Улаан имж өглөө, оройн сэрүүнд идэвхтэй ба өдрийн цагийг унтаж амарч өнгөрүүлдэг. Тэд нэг бол ганцаар, эсвэл 2-10 толгой сүрэглэн амьдарна. Зарим үед хэдэн зуугаар сүрэглэх нь бий. Эрэгчин имж газар нутаг эзэмшихгүй ба ороо нь орсон үед эмэгчинээ булаацалдан тэмцэлдэх явдал бий.

Идэш тэжээл

Амьтны хүрээлэн дэх эрэгчин улаан имж.

Голдуу өвс ургамлаар хооллоно. Тэд зөвхөн ургамлын шим чийгээр усгүй удаан байж чаддаг.

Үржил

Тэд жилийн аль ч үед үржилд орох ба эмэгчин нь 33 хоног хээлээ тээнэ. Зулзага нь эхийнхээ уутанд ороод 235 хоног өсөж торнин уутнаас гарах ч 12 сар хүртлээ хөхсөөр байдаг байна.

 Commons: Macropus rufus – Викимедиа дуу дүрсний сан