Мукеш Амбани

Мукеш Дхирубхай Амбани (англи. Mukesh Dhirubhai Ambani, 1957 оны 4-р сарын 19-нд Йемен улсын Аден хотод төрсөн) —Энэтхэгийн бизнесмен бөгөөд Форбс сэтгүүлийн 2008 оны мэдээллээр Энэтхэг улсын хамгийн баян хүн юм.

Энэтхэгийн хамгийн том хувийн хэвшлийн компани болох "Reliance Industries"-ийн ТУЗ-ийн дарга, гүйцэтгэх захирал бөгөөд компаний 48% хувьцааг эзэмшдэг байна.

Форбс сэтгүүлийн үзэж буйгаар 2023 оны байдлаар Мукеш Амбанигийн хөрөнгө 83.4 тэрбум доллараар үнэлэгдсэн байна. Тэрээр Энэтхэгийн хамгийн баян хүн хэмээх статусаа хадгалсаар байна.

Намтар

Мукеш гэр бүлээсээ хамгийн анх дээд боловсрол эзэмшсэн хүн юм. Эхлээд Бомбейн их сургуулийг инженер, химийн технологийн чиглэлээр бакалавр, дараа нь АНУ-ын Стэнфордын их сургуульд бизнесийн удирдлагын магистрын зэрэг хамгаалахаар сурч байсан. Гэвч тэрээр 1981 онд 24 настайдаа эцгийнхээ бизнест орохоор сургуулиа орхижээ. Тухайн үед гэр бүлийн бизнест нефтийн химийн бүтээгдэхүүн, газрын тос боловсруулахаас гадна байгалийн хий, полиэфир эслэг, полиэфирийн үйлдвэрлэл, харилцаа холбооны технологиуд аль хэдийн орсон байв.

Амбани 2010 оноос хойш Давост жил бүр дэлхийн эдийн засаг, эрүүл мэнд, байгаль орчны асуудлыг хэлэлцдэг Дэлхийн эдийн засгийн форумын (ДЭФ) удирдах зөвлөлийн гишүүнээр ажиллаж байна.