Валенсиа (хөлбөмбөгийн баг)
Валенсиа Хөлбөмбөгийн Баг (кат. València Club de Futbol[1] буюу Валенсиа) нь Испанийн Валенси хотод байрладаг мэргэжлийн хөлбөмбөгийн баг юм. Ла Лигад тоглодог тус баг нь Испанийн хөлбөмбөг болон Европт хамгийн өндөр амжилтад хүрсэн багуудын нэг билээ. Тэд 6 удаа Ла Лигагийн аварга болж, 7 удаа Копа дель Рей цомыг хүртэж, УЕФА-гийн цомын хуучин хувилбар болох Фэйрс цомд 2 удаа түрүүлснээс гадна УЕФА-гийн цом, УЕФА Цомтой багуудын цомыг тус бүр 1 удаа, УЕФА Супер цомыг 2 удаа хүртэж байв. Мөн УЕФА Аваргуудын Лигийн шигшээ тоглолтод 2 дараалан шалгарсан амжилтыг үзүүлэхдээ эхний удаад нь буюу 2000 онд Ла Лигагийн өрсөлдөгч Реал Мадридад хожигдсон бол 2001 онд Германы Бавари Мюнхен багтай 1-1 харьцаатай тэнцээд, торгуулийн цохилтоор ялагдаж байжээ. Валенсиа нь Европын хөлбөмбөгийн тэргүүлэх багуудын G-14 бүлгийн гишүүн юм. Валенсиа баг Европын томоохон цомын тэмцээнүүдийн шувтаргад нийт 7 удаа шалгарч, үүнээс дөрөвт нь түрүүлж байжээ.
| Бүтэн нэр | Хөлбөмбөгийн Валенсиа Баг | |||
|---|---|---|---|---|
| Хоч нэр | Los Che Els taronja (Улбар шарууд) Valencianistas | |||
| Байгуулагдсан | 1919 оны 3 сарын 18 | |||
| Цэнгэлдэх хүрээлэн | Месталья (Багтаамж: 55,000) | |||
| Ерөнхийлөгч | Питер Лим | |||
| Менежер | Воро | |||
| Лиг | Ла Лига | |||
| 2018-19 | Ла Лига, 4-р байр | |||
| ||||
 Энэ улирал | ||||
Ла Лигагийн бүх цаг үеийн түүхэнд үзүүлсэн амжилтаараа Валенсиа баг Реал Мадрид, Барселона багуудын дараа гуравт бичигддэг. Европын цомын тэмцээнүүдэд үзүүлсэн амжилт нь ч дээрх хоёр багийн дараа орох бөгөөд Испанийн багуудаас уг гурван баг л тивийнхээ цомыг 5 болон түүнээс дээш удаа хүртэж байв[2].
Валенсиа баг 1919 онд байгуулагдаж, 1923 оноос хойш 55,000 суудалтай Месталья цэнгэлдэх хүрээлэнд тоглолтоо хийж байна. 2011 онд 75,000 үзэгчийн суудалтай Ноу Месталья хэмээх шинэ цэнгэлдэх хүрээлэн нь хотын баруун хойд хэсэгт ашиглалтад орно. Валенсиа баг нь өөрийн хотын бас нэгэн баг болох Леванте, мөн Валенсиа Коммюнити бүст орших Эркулес, Вильярреал багуудтай олон жилийн турш өрсөлдөж иржээ.
Валенсиа нь хөгжөөн дэмжигчдийнхээ тоогоор Испанийн хөлбөмбөгийн багууд дунд мөн л Реал Мадрид, Барселона багуудын дараа ордог[3]. Бүртгэлтэй дэмжигчдийн тоогоороо дэлхийд томоохонд тооцогдох тус багийн улирлын тоглолтыг үзэх эрхийг 50,000 гаруй хүн худалдаж авсан байдаг бөгөөд шинэ цэнгэлдэх хүрээлэн ашиглалтад орох үед уг эрхийг худалдаж авахаар 20,000 гаруй хүн аль хэдийн захиалгаа өгөөд буй аж.
Эшлэл
засварлах- ↑ "Valencia CF history in valencian (named València CF in article)". Эх хувилбараас архивласан: 2011-11-27. Татаж авсан: 2011-02-23.
- ↑ Football Europe: Valencia CF
- ↑ Sociological Investigation Center – CIS, May barometers (Испани)
Цахим холбоос
засварлах
Commons: Valencia CF – Викимедиа зураг, бичлэг, дууны сан- Албан ёсны вэбсайт (Испани) (Каталан) (Англи) (Япон)
- Шинэ цэнгэлдэх хүрээлэн