Борис Смирнов

Борис Федорович Смирнов (1912.04.04. Петербург – 1971.05.03.Москва) – ЗХУ-ын ардын урлаг судлаач, хөгжмийн зохиолч. 1912 оны 4-р сарын 4-нд Петербург хотноо төржээ. 1939 онд Ленинградын (хуучнаар) Н.А.Римский-Корсаковын нэрэмжит хөгжмийн дээд сургуулийг хөгжмийн зохиолч мэргэжлээр М.Ф.Гнесины ангид төгсжээ. 1940-1946 онуудад Монголын Хөгжимт драматик театрт хөгжмийн зохиолч, хөгжмийн сургагч багшаар ажиллаж байв. 1946-1953 онд Москвагийн хөгжмийн дээд сургуулийн дэргэдэх ардын хөгжмийн тэнхимд эрдэм шинжилгээний ажилтан, 1952-1955 онд баримтат киноны төвд хөгжмийн ахлах редактороор ажиллаж байжээ. Тэрээр орос ардын олон тооны дуунуудыг цуглуулан бичиж, хэвлүүлж байжээ.

Уран бүтээл

• “Гайхамшигт лимбэ”(1940)
• “Учиртай гурван толгой” дуурь (Б.Дамдинсүрэнтэй хамт, 1942)
• хөгжимт драмын жүжиг “Шарай голын гурван хаан” (1943)
• “Амарсанаа”(1944)
• “Цогт тайж” киноны хөгжим (Л.Мөрдорж, Б.Дамдинсүрэн нартай, 1945)

болон оросын кино, жүжгийн хөгжим бичсэн ажээ.

Утга зохиол

• “Музыкальная культура Монголии”М., 1963
• “О мелосе монгольской народной песни” (Музыка народов Азии и Африки. М., 1969)
• Монгольская народная музыка. М., 1971
• “Музыка народной Монголии” М., 1975.