Ханэда (онгоцны буудал)
Ханэда олон улсын нисэх онгоцны буудал (япон. 羽田空港 Ханэда күүкоо, Мөн "Токио хотын олон улсын нисэх онгоцны буудал" (япон. 東京国際空港 Тоокёо кокүсай күүкоо) - Японы нийслэл Токио хотын Ота дүүрэгт байрладаг, Их Токио хотод үйлчилдэг хоёр том нисэх онгоцны буудлын нэг юм. Ханэда буудлаас Токио руу болон буцах дотоодын бараг бүх нислэг үйлддэг бол Нарита олон улсын бараг бүх нислэгийг үйлддэг.
Ханэда нисэх онгоцны буудал 2016 онд 79.7 сая зорчигчдод үйлчилжээ. Үйлчилж буй зорчигчдын тоогоороо Ази тивдээ гуравт, дэлхийд тавдугаарт ордог нисэх онгоцны буудал юм. Ханеда бол "Japan Airlines", "All Nippon Airways" гэсэн хоёр том агаарын тээврийн компанийн үндсэн бааз юм.
Японы Тээврийн яамнаас Токиогийн булангийн хэсгийг Ханэда нисэх онгоцны буудлын бүтээн байгуулалтад зориулж далан барихаар нөөцөлсөн ч Токио хотын эрх баригчид энэ талбайг хог хаях зориулалтаар ашиглаж эхэлсэн бөгөөд ингэснээр өргөтгөл хийх боломжтой далан хэлбэртэй хиймэл газар байгуулжээ. 1988 оны 7-р сард энэ талбайд шинэ онгоц хөөрөх зурвас нээгдэв. 1993 оны 9-р сард нисэх онгоцны буудлын хуучин терминалыг хогийн цэг дээр барьсан "Big Bird" нэртэй шинэ зорчигч тээврийн баруун терминалаар сольсон. 1997 оны 3-р сар эхэлж 2000 оны 3-р сард хоёр шинэ хөөрөх зурвасын барилгын ажил дууссан. 2004 онд ANA болон Air Do агаарын тээврийн компаниудын Терминал 2 нээгдсэн; Өнөөдөр Терминал 1 гэгддэг 1993 оны терминал нь JAL, Skymark, Skynet Asia Airways компаниудын үндсэн төв болсон байна.
2007 оны 6-р сард Ханэда 20:30-23:00 цагийн хооронд хөөрөх, 6:00-8:30 цагийн хооронд буух онгоцны зорчигчдод үйлчлэх эрхийг авсан. Нисэх онгоцны буудал 23:00-6:00 цагийн хооронд нислэг хүлээн авч, хөөрч болдог хуваарьтай болжээ.
| Агаарын тээврийн компаниуд | Нислэг хийх чиглэлүүд |
|---|---|
| All Nippon Airways | Хонконг, Сөүл (Гимпо), Шанхай (Хунцяо), Франкфурт, Москва (Домодедово) |
| Asiana Airlines | Сөүл (Гимпо) |
| Cathay Pacific | Хонконг (чартер) |
| China Eastern Airlines | Шанхай (Хунцяо) |
| Hawaiian Airlines | Хонолулу |
| Korean Air | Сөүл (Гимпо) |
| Japan Airlines | Хонконг, Сөүл (Гимпо), Шанхай (Хунцяо), Франкфурт, Хонолулу, Парис, Москва (Шереметьево) |
| S7 Airlines | Владивосток |
| Shanghai Airlines | Шанхай (Хунцяо) |
Ханэда бол Нарита, Кансай нисэх онгоцны буудлын дараа орох гурав дахь том ачаа тээврийн төв юм. Нисэх онгоцны буудал нь Токиогийн төв хэсэгт ачаа тээвэрлэдэг гол галт тэрэгний буудал болох Токиогийн ачаа тээврийн терминалтай зэргэлдээ байрладаг.